Mizinga ya Israeli yalenga Hamas baada ya mashambulizi ya mabofu kutoka Gaza

Jeshi nchini Israeli limesema leo kuwa limeshambulia ngome za kundi la Hamas katika ukanda wa Gaza huku mashambulizi ya Palestina yanayoongezeka yakiendelea licha ya juhudi za amani za kimataifa.

Katika taarifa iliyotolewa mapema leo, jeshi hilo limesema kumekuwa na mashambulizi ya milipuko ya angani na ya moto Kusini mwa nchi hiyo siku ya Jumamosi na kwamba kwa kujibu matukio hayo, makombora yalirushwa katika vituo vya kijeshi vya kundi la wanamgambo la Hamas katika eneo la Kusini la ukanda wa Gaza.Hata hivyo hakuna ripoti ya majeruhi iliyotolewa.

Israeli imekuwa ikishambulia ukanda wa Gaza karibu kila siku tangu Agosti 6 kujibu vifaa vya mashambulizi ya moto na mara kadhaa makombora yanayorushwa kuvuka mpaka.

Ujumbe wa Misri umekuwa ukiwasiliana na pande zote mbili kujaribu kuchochea kurejelewa upya kwa mkataba usiokuwa rasmi wa amani ambao Israeli imejitolea kulegeza vikwazo vya muda wa miaka 13 dhidi ya Gaza ili kurejesha utulivu katika eneo la mpaka.